Tenochtitlan

Auh ino ipan kisato inokittakeh senka miektlamantli in tlanauisoli in onkanka in akaihtik kaye ika ipampa in nauatil yukimilui in Uitsilopochtli in teomamake in itauan in Kuautleketski anoso in Kuaukouatl in Axoloua tlamakaski ka kin nauati ka yukimilui in ixkich in onkan inonok in tolitik in akaihtik in onkan ihkas, in onkan tlapies in yeuatl in Uitsilopochtli ka itenkopa kimilui ka yukin nauati in Mexika, auh niman okittakeh istak in aueuetl, istak in uexotl, in onkan ihkak, iuan istak in akatl, istak in tolli, iuan istak in kueyatl istak in michin, istak in koatl, in onkan nemi atlan, auh niman okittakeh nepaniuhtikak intexkalli in ostotl, inik se in texkalli in osotl tonatiuh ikisayan itstok itoka tleatl, Atlatlayan. Auh inik ome in texkalli in ostotl miktlampa Itstoc, inik nepaniuhtok, itoka Matlalatl, iuan itoka Toxpalatl.

Auh inokittaque niman yechoka in ueuetkeh kitoua anka yenikan yes, kaotikittakeh intechilui inik technauati in tlamakaski in Uitsilopochtli inkihto inyuki ankittaskeh in Tolihtik in akaihtik miektlamantli in onkan ka auh in axkan koatikittakeh, otik mauisokeh, kaye nelli kaomochiuh kaoneltik in tlahtol inik technauati, niman okihtokeh Mexikayeh maoktiuian kaotitlamauisokeh maoktik tlahtolchiyekan in tlamakaski yeuatl kimati kenin mochiuaz, niman oualakeh motlalliko in onkan Temaskaltitlan, auh niman youaltika in okittak inokimottiti in teomama initoka Kuautleketski anoso Kuaukouatl in yeuatl in Uitsilopochtli, okilui Kuaukouatle kaouankittakeh in ixkich in onkan onok in akaihtik ouan tlamauisokeh. Auh tlaxikkakika oksentlamantli in ayemo ankitta. Auh inin xiuian, xikittati in Tenochtli in onkan ankittaske ik paka ikpak, ihkak in yekuatl in kuauhtli onkan tlakua, onkan mototonia, auh ka ik pachiui in amoyolo, ka yeuatl iniyolo in Kopil intikualmayauh in onkan timokets tlalkokomoko. Auh niman onkan uetsiko ino ankittakeh texkaltempa, Ostotempa in Akatsalan in toltsalan, auh ka onkan ixuac iniyolo in Kopil, in axkan motokayotia Tenochtli, auh ka onkan intieskeh in titlapieskeh, in titechieskeh intitenamikiskeh in nepapantlaka telchikiuh totsonteko tomiuh tochimal, inik tikimittaskeh in ixkich intechyaualotok ixkich tikinpeuaskeh tikimasiskeh ik manis in taltepeuh Mexiko Tenochtitlan kuautli ipipitekayan inetomayan kuautli itlakuayan, iuan michin ipatlanian, iuan kouatl isomokayan in Mexiko in Tenochtitlan, auh ka miektlamantli in mochihuas, niman okilui in Kuaukouatl, kayekualli tlamakaskeh otlakauhki imoyolotsin makikakikan imotauan in ueuetkeh in ixkichtin, ik niman okinsentalli in Mexika in Kuaukouatl okinkakilti initlatol in Uitsilopochtli inokikakeh Mexika.

Auh niman onoksepa yake in Toltsalan in Akatsalan, in Ostotempa, auh ino ipan kizato Akatitlan ihkak in Tenochtli, in onkan (Ostotempa inokittakeh ikpaka ikpak ihkak moketstikae in Kuautli in yeuatl in Tenochtli onkan tlakua, onkan kikua kitsotsopitstikak in kikua, auh in yeuatl in kuautli inokimittak in Mexica senka omopechtekak in kuautli, san uekapa in konittakeh) Auh initapasol inipepech, san moch yeuatl in ixkich inepapan tlaso iuitl in ixkich in xiutotoiuitl, in tlauhkecholiuitl, in ixkich ketsalli, auh san no onkan kittakeh in onkan tetepeuhtok inin tsonteko inepapan totomeh in tlasototomeh in tsonteko onkan sosotikate, iuan sekitoto ikxitl, seki omitl, auh onkan kinnots in Diablo kimilui Mexikaye ye onka yesin, auh yeseh amo kitta in Mexika in akinkinotsa ik onkan tlatokayotikeh Tenochtitlan auh niman ye ik choka in Mexika kitoa otoknopiltik, otomaseualtik kaotik mauisokeh in taltepeuh yes, maoktiuian, maoktitoseuiti.

Mexiko, Tenochtitlan